2017年6月27日

蓉城乒變


報紙話,喺蓉城舉行嘅國際枱波巡迴大賽,有兩個教頭同三個國手集體棄戰,跟住,嗰幾個國手各自但用同一內容響細博訴心聲:「家陣我地無心戀戰,因為掛住你,肥仔!」嘩噻!乜咁大鑊?競技衙門嬲到即刻撲出嚟,發哂爛渣,大鬧教頭同國手冇道德操守,置國家榮譽利益不顧,仲話要「嚴肅處理」。 根據報導,呢件事之前,有一對國手組合無喇喇輸咗比㗎仔嗰啤無名小卒,再之前,有靚仔之稱國手打唔夠幾下就話負傷棄戰。 班友到底搞乜鬼? 

呢件事都算轟動,無論響國際抑或響神州大地,都係大新聞同熱門話題,我估呢件事十居其九同肥仔忽然之間升上神枱有關。 肥仔做咗主帥凡十四年,帶住班戰將南征北討,所向披靡,攞獎攞到手軟,功勞簿厚過電話簿,好似最近嗰次錦標戰,喺佢指揮之下又攞到上好成續,佢自己仲話要領軍再戰2020扶桑五環賽。 話口未完,就俾衙門叫下課,表面上升佢做枱波協會副主席,實際上明升暗降,呢個枱波協會淨係副主席已經有廿個咁多,咁樣升呢有冇作為,明眼人一睇就清楚。 

肥仔一向深受麾下戰將擁戴,帥將同甘苦,共患難,情深義厚,戰將今番見到主帥俾人奪去兵符,暗生怨憤,但苦於無處可以發聲,於是出呢招棄戰下策,真係該煨! 

競技衙門最近動作多多,響脚波、大波、細波、羽毛波各方面都有新措施,搞到怨聲載道。 呢次枱波戰將集體棄戰,衙門唔理三七二十一,就大大聲話要嚴肅處理,會唔會衝動咗啲吖? 會唔會更加激化矛盾呀? 其實,戰將棄戰的確係唔多啱,佢地太過意氣用事,而且仲好消極,冇體育精神添,朝廷用舉國之力去栽培你,冇理由嗖聲就棄戰喎,有乜事都好,打完仗至講。 人係感情動物,佢地出於對主帥嘅同情,先至會行今日呢一步,不過,內裡究竟仲有乜野原因?斷唔會係佢地以爲自已係大牌,戰績彪炳,功高震主咁簡單?另一方面,競技衙門啲新行政措施有冇失當?係唔係堅離地?都應該檢討下。 

今次事件,雖然作戰團隊已經道歉同檢討,但係,衙門無理由浄會識得處罰而唔作詳細解釋,至低限度要話俾百姓知道,點解要將肥仔「榮升」,同時,早排另一個主帅涉及賭博俾人告,兩件事有冇關連,都要同百姓講清講楚。