2012年9月11日

廟堂選舉八段錦

廟堂選舉八段錦

文章日期:09/11/2012 01:50 pm

舊年十一月區會改選,小弟寫咗篇《區選成語八段錦》,各位諸君如有興趣睇下,歡迎點擊文下連結登臨瀏覽,指教指教。今日,新一屆廟堂地區直選同超級議席選舉結果公佈,種種懸念一概釋除,縱觀結果,又撩起我一番亂㬛無為興趣,寫出嚟同大家分享一下,題目沿襲八段錦(八段文字)



贏咗形勢輸咗波
呢次五區直選煩民得票率為56%,取得廟堂18席,佔直選議席51%;見祭得票率為44%,卻取得17席,佔48%,效率高過煩民。如按得票率計算,煩民大概虧蝕12席,難怪煩民成員人人呻笨,重諉過於聞見元配票成功,其實聞見元呢招都係向白鴿黨偷師啫。假如用足球述語嚟形容選舉結果,就係:贏咗形勢輸咗波,六四黃金比例被打破。白鴿黨呢鋪輸喺由自己爭返嚟嘅選舉方案,令人十分惋惜,公文袋班狀棍不思受惠嘅恩典,重冷言冷語,呢啲咁嘅合作伙伴,下次要稔過至得。



再作馮婦和崔護重來
新界東嘅大少和胡鬚仔兩人,失落上屆議席後,經過同場較量雙雙重返廟堂,一個再作馮婦,一個崔護重來。前者是煮食級人物,有領導才能,但性格有啲似魏延;後者煩民成員,都幾偏激,日後廟堂之上,唔知兩人會否上演Face Off



成功男人背後有女人
公文袋紅花會總舵主首次出戰,原來成功背後要靠香香公主,可惜香香公主以身相許之餘,重要香銷玉殞,唯有含住淚水說Good Bye。另一個公文袋嘅惡得奇同樣要靠女人,靠大家姐惡得厲至入到廟堂,呢兩個男人到得㗎啦,靠女人至上到位。



廟堂上風雨交加,永無寧日
上屆成日擲紙仔、曠課、拉布嗰三個曳曳,今次唔單止蟬聯,而且高票當選,重要多個慢一拍,呢次大鑊,四大癲王一出,誰與爭鋒?隨住煩民溫和派全線失手,偏激派力量抬頭,相信開會之時日日鬧大交,拍枱拍凳擲紙仔,實行攪風攪雨,我地班蟻民唯有瞌埋雙眼無眼睇。



「儀」不容辭,一語成懺
「儀」不容辭呢次太過自信,甘願放下俯拾即是嘅功能選舉,身為一個女人仔獨闖龍潭虎穴,以為可以殺出一條血路,喊到聲嘶力竭,最後都只得萬幾票,比同區最後一名入圍嗰位人兄,幾乎少咗成萬票。呢次阿姐冇得留低之餘,重要辭去煮食個位,實行自我問責,「儀不容辭」一語成懺,哎,早知如此何必當初?



全城告急
「你急我急個個急,聲淚俱下眼濕濕。由來哀兵易上陣,張張選票任你執。」投票日,無論街上、選舉車上,電視上,甚至報紙上,一片告急之聲,急到幾乎受到感染,廁所都去多幾次。其實呢招都幾有效,唔少人受惠當選,當中有個人值得一提,佢就係滑姐姐,明知自己落後,佢一啲都唔急,重話急就返屋企揍仔啦。講得好,有性格,輸咗都話你好嘢。



為山九仞,功虧一簣
人人都話聞見元配票好嘢,佢地喺地區直選中分票成功,九人全部當選,見到班兄弟咁爭氣,男人老狗嘅煮食激動到流曬眼淚。當大家沉浸喺一片歡樂氣氛之際,最最緊要嘅超級議席開票有咗結果,華哥竟然入唔到圍,只有靚女搞掂。華哥攞20萬票,少最尾入圍嘅河老大3萬票,而靚女攞28萬票,如果兩人分票成功,靚女分三四萬張票比華哥,咁咪老少平安,攜手入廟堂囉。聞見元喺直選嗰邊咁精彩,呢邊咁失策,真係為山九仞,功虧一簣!

兄弟鬩牆,後患無窮
聞見元係大贏家,工人會好似唔多服氣。會長糖果竟然話忍咗好耐,一個落選者又話公道自在人心,重作馮婦嘅恆姐,又不斷指責聞見元票。阿姐,唔好唔記得,當日你都係聞見元成員,依家嘅煮食都係出身你間工人會,米以為曾經做過漂后(),韓信一定返嚟報恩。經過呢鋪,兄弟鬩牆格局已成,都唔知點收科。