廟眾坊榕美食都

星島日報照片美都餐室

網絡照片廟街牌坊

網絡照片榕樹頭

文題係將「眾坊街」、「天后廟」、「榕樹頭」、「美都餐室」幾個油麻地地標串成，標題不求甚解，惟自我感覺良好，所以希望各位多多包涵。 

報載美都餐室貼出告示： 「人生有幾個十年？不經不覺美都餐室喺呢個地方，已經渡過咗七十二年，就畀佢喺呢個時候放鬆下心情，喺呢個moment抖抖氣」，用中、英、日、意、西、法六國文字說「再見」。嘩！美都餐室原來已經有七十年歷史，唔講真係唔知，結業都「六國大封相」，認真巴閉！呢間餐廳KM去過多次，有啲情意結，每次去都要揀樓上面對榕樹頭臨窗卡位，貪坐嗰度風涼水冷，可以盡覽榕樹頭眾生相，如果冇位，情願走人，下次再幫襯， 老實講，呢度食嘢就麻麻哋啦。老字號終不敵疫病，喺隨心所欲之年結業，光榮之外就只有唏噓。  聽講，灣仔大榮華下個月底前說「Goodbye 」，韜哥已經通知諸多老友，要幫襯要打卡要懷舊請早。 

廟街榕樹頭係大名鼎鼎平民夜總會，未去過都唔算得係香港人，呢兩處地方好似孖公仔連環扣，去廟街唔去榕樹頭，必定若有所失；只去榕樹頭唔去廟街，更加係入寶山空手回。 廟街人山人海，越夜越精彩，越黑越墮落，當年去廟街只敢行街中心，買牛仔褲、明星海報，同卡式錄音帶等物品，感受下熱鬧氛圍，絕唔行近騎樓底，因嗰處係特殊嗜好交易所。 行完廟街冇理由唔去榕樹頭咬枝熱蔗聽下古仔，或者聽一場露天歌唱表演，聽完買唔買生欖或香口膠悉隨尊便，嗰D算命就一定唔幫襯，我嫌佢哋所學「水皮」過我，不過，麻雀仔擔籤文把戲就幾得意。  

廟街大牌檔林立，我甚少入去幫襯，當年同老婆去普慶戲院睇戲，多數去戲院隔離間「醉瓊樓」，或者去彌敦酒店地下嗰間「地茂館」，如果兩間都滿座至間唔中入去「醉仙樓」，都係貪佢間店名與《射雕》江南七怪同丘處機比武間酒家一樣。 

眾坊街嗰名好普羅大眾，英文名 Public Square Street ，曾幾何時，中文直譯成公眾四方街，真係直竹都冇咁直，又唔知幾時改名為眾坊街，不過又改得幾好，夠貼地，嗰處真係好多群眾街坊，生活氣息極為濃厚。 

寫咗咁多，差啲唔記得提主角天后廟，呢間天后廟規模未算全港最大，估計細過佛堂門嗰間大廟，而號稱最正宗嘅天后廟道天后廟就細佢啲，不過「山不在高，有仙則靈」。 眾坊街呢間天后廟係廟街同榕樹頭嘅發祥地，冇佢，廟街無以為名；冇佢，榕樹頭無地安身，廟前棵老榕樹見證香港百年蒼桑，樹下鬼古連遍，聽過就算，包括 KM 呢篇嘢。